बिहेको तीन दिनमै श्रीमान भागेपछि दुलही अलपत्र

पर्वत, असार १४ – संगै जिउने र मर्ने कसम खाएका श्रीमानले छाडेपछि अन्तरजातीय बिबाह गरेकी एक दलित युबती अलपत्र परेकी छन् ।

ब्राह्मण युबासंग तीन हप्ता पहिले बिहे गरेकी चित्रे गाविस ५ की अनिता बिक श्रीमानले छाडेर भागेपछि अलपत्र पर्नुभएको हो ।

अनिताले तिलहार गाबिस–६ डिमुवाबजारका रामचन्द्र सुबेदीसंग जेठ २४ मा बिबाह गर्नुभएको थियो । बिबाहको तीन दिनपछि श्रीमानले अलपत्र छाडेर भागेको भन्दै अनिता न्याय माग्न बिभिन्न निकायमा धाउनुभएको छ ।

उहाँले न्याय दिलाउन दलित बर्ग उत्थान समन्वय समिति र दलित साझा मञ्चमा निबेदन दिनुभएको छ । त्यसैगरी प्रहरीमा दिएको निबेदनमा पनि श्रीमानले बेवास्ता गरी भागेर अन्याय गरेको बताउनुभएको छ ।

मंसिरदेखि बसेको प्रेमलाई जेठ २४ गते बिबाहबाट बैधानिकता दिएपछि उनीहरु बाजुङमा डेरा गरेर संगै बस्दै आएका थिए ।

तर आफन्तले झुक्याएर घर लगेपछि सुवेदी नफर्किएका बिकको भनाई छ । सुबेदी बाजुङ्गको एक निजी बिद्यालयमा शिक्षक हुनुहुन्थ्यो ।